टी-20 : बांगलादेशचा भारतावर सात गडी राखून विजय

Deshdoot

Deshdoot

Author 2019-11-04 03:39:00

img

नवी दिल्ली । मुशफिकुर रहीम याची अर्धशतकी खेळी आणि सौम्य सरकारनं केलेल्या 39 धावांच्या जोरावर बांगलादेश संघानं पहिल्या टी-20 सामन्यात भारताचा सात गडी राखून सहज विजय मिळवला. कृणाल पंड्यानं सीमारेषेवर मुशफिकुर सोडलेला झेल भारताला महागात पडला. मुशफिकुरनं 60 धावांची तुफानी खेळी केली. या विजयासह बांगलादेशनं तीन टी-20 सामन्यांच्या मालिकेत 0-1 अशी आघाडी घेतली.

बांगलादेशनं नाणेफेक जिंकून प्रथम क्षेत्ररक्षणाचा निर्णय घेतला आणि तो त्यांच्या पथ्यावरही पडला. प्रथम फलंदाजीसाठी उतरलेल्या भारतीय संघाची सुरुवात अडखळतच झाली. बदली कर्णधार असलेला रोहित शर्मा अवघ्या नऊ धावा करून बाद झाला. त्यानंतर आलेल्या लोकेश राहुलनं शिखर धवनला साथ देण्याचा प्रयत्न केला. मात्र, धावगती वाढवू शकले नाहीत. शिखर धवननं 41 धावांची खेळी केली, मात्र त्यासाठी 42 चेंडू खेळावे लागले. संघाच्या 36 धावा असतानाच, लोकेश राहुलही वैयक्तिक 15 धावांवर बाद झाला. त्यानंतर श्रेयस अय्यरनं डाव सावरण्याचा प्रयत्न केला. पण तोही संघाच्या 70 धावा असताना, वैयक्तिक 22 धावांवर बाद झाला. एका बाजूनं टिच्चून फलंदाजी करणारा धवन संघाच्या 95 धावा असतानाच बाद झाला. त्यानंतर रिषभ पंतनं 27 धावा आणि वॉशिंग्टन सुंदरनं 14 धावा करून संघाला 148 धावांपर्यंत मजल मारून दिली.
149 धावांचं लक्ष्य घेऊन मैदानात उतरलेल्या बांगलादेश संघाला लिटन दासच्या रुपानं पहिलाच धक्का बसला. तो अवघ्या 7 धावांवर बाद झाला. मात्र, त्यानंतर आलेल्या सौम्य सरकारनं (39 धावा) मोहम्मद नईमच्या साथीनं 46 धावांची महत्वाची भागीदारी रचली. नईम बाद झाल्यानंतर सरकार आणि मुशफिकुरनं धावगती राखली. या दोघांनी 60 धावांची भागीदारी रचत संघाला विजयासमीप नेलं. मुशफिकुरला कृणाल पंड्यानं दिलेले जीवदान भारतीय संघाला महागात पडलं. मुशफिकुरनं 60 धावा कुटल्या. त्यात आठ चौकार आणि एका षटकाराचा समावेश आहे. मुशफिकुर आणि महमुदुल्लाहनं बांगलादेशला विजय मिळवून दिला.

दरम्यान, बांगलादेशकडून शफिउल इस्लाम आणि अमिनुल इस्लाम यांनी प्रत्येकी दोन गडी बाद केले, तर अफिफ होसेननं एक गडी बाद केला. भारताकडून दीपक चहर, खलील अहमद आणि चहलनं प्रत्येकी एक गडी बाद केला.

READ SOURCE

Experience triple speed

Never miss the exciting moment of the game

DOWNLOAD